Gəncə Şəhər İcra Hakimiyyətində Görüş Keçirilib

Gəncə Şəhər İcra Hakimiyyətinin başçısı Niyazi Bayramov İsrail Dövlətinin Azərbaycan Respublikasındakı fövqəladə və səlahiyyətli səfiri Ronen Krauz ilə görüşüb. Görüş zamanı iki ölkə arasındakı əlaqələr və Gəncə şəhərinin potensialı müzakirə olunub.

Niyazi Bayramov qonağı salamlayaraq, ona Azərbaycandakı diplomatik fəaliyyətində uğurlar arzulayıb. Daha sonra qədim tarixə malik Gəncə şəhəri haqqında ətraflı məlumat verilib. Bildirilib ki, Gəncə Azərbaycanın ikinci böyük şəhəri olmaqla yanaşı, mühüm sənaye, təhsil və mədəniyyət mərkəzlərindən biridir. Şəhərdə Beynəlxalq Hava Limanı fəaliyyət göstərir, “Gəncə Avtomobil Zavodu” İstehsalat Birliyi, “Azəralüminium” MMC, “Gəncə Şərab-2” və digər iri sənaye müəssisələri yerləşir. Həmçinin Gəncədə üç universitet, üç kollec və bir sıra mühüm mədəniyyət müəssisələrinin olduğu bildirilib.

Şəhərin Beynəlxalq Uğurları və İdman Layihələri

Görüşdə şəhərin beynəlxalq səviyyədə qazandığı uğurlardan da söz açılıb. Bildirilib ki, Gəncə müxtəlif illərdə Avropanın Gənclər Paytaxtı, MDB ölkələrinin Mədəniyyət Paytaxtı və Avropanın İdman Şəhəri seçilib. 2025-ci ildə isə Gəncə III MDB Oyunları çərçivəsində bir sıra idman yarışlarına ev sahibliyi edib. Şəhərdə müasir standartlara cavab verən İdman Sarayı və Gəncə Şəhər Stadionu da inşa olunub.

Niyazi Bayramov Azərbaycanın müxtəlif xalqların və dini icmaların sülh və qarşılıqlı hörmət şəraitində birgə yaşadığı tolerant və multikultural ölkə olduğunu da vurğulayıb.

Səfirin Qiymətləndirməsi və Əməkdaşlıq Perspiktivləri

Səmimi qəbula görə təşəkkürünü bildirən İsrailin Azərbaycandakı səfiri Ronen Krauz Gəncənin potensialını yüksək qiymətləndirərək, qarşılıqlı əlaqələrin konkret layihələr vasitəsilə daha da genişləndirilməsinin vacibliyini qeyd edib.

Görüşdə Gəncədə fəaliyyət göstərən ali təhsil müəssisələri ilə İsrail universitetləri arasında əlaqələrin inkişaf etdirilməsi, tələbə və mütəxəssis mübadiləsinin təşkili imkanları müzakirə olunub.